Aswè fre, maten frèt kou glas ak tanperati k ap bese : depi wikenn pase a, anpil Ayisyen santi yon fredi ki pa nòmal pou sezon an. Dèyè fenomèn sa a, gen fwon frèt ki soti nan Nò kontinan an.
Depi kèk jou, Pòtoprens, Okap ak plizyè lòt vil nan peyi a ap anrejistre tanperati ki pi ba pase nòmal. Kèk repòtè O-News 1ère remake nan lari anpil abitan k ap tranble kou fèy bwa. Sitwayen sa yo di yo sezi ak frèt lannuit sa yo, kote kouran lè fre ap antre nan kay yo epi fè yo vin frèt, menm lè yo kouvri ak dra.
« Mwen pase prèske 2 jou san m pa benyen. Mwen te sèlman pase yon sèvyèt mouye sou kèk pati esansyèl nan kò mwen », se sa Hérode Pierre, ki gen 17 lane, di nou pandan l ap ri.
Daprè done ki disponib, plis pase yon dizèn fwon frèt frape Ayiti ant novanm ak fevriye, ak tanperati ki pafwa desann rive 17 °C. Fredi sa a rive akoz lè frèt ki soti Amerik di Nò, ki fè tanperati yo bese sitou bonè nan maten.
Pou kounye a, genyen yon nouvo fwon frèt ki soti nan zòn aktik la ki anvayi Karayib la, epi ki konsène Ayiti soti 2 pou bout 4 fevriye 2026 la. Nan sans sa a, otorite meteyowolojik yo mande popilasyon an pou rete vijilan, sitou moun ki pi frajil yo, devan chanjman tan sa yo. Sa raple nou menm nan peyi twopikal, klima ka toujou pote sipriz.
