Depi arestasyon animatè vedèt Carel Pedre 21 desanm 2025 lan nan Broward, Ozetazini, yon gwo nyaj dout plane sou sitiyasyon li. Kesyon viza G-2 li a, yon viza diplomatik, vin mete tout dosye a anba gwo limyè, ant konfizyon, sispisyon ak kesyon ki mande repons aklè.
Jounalis kiltirèl ayisyen Carel Pedre te rantre Ozetazini ak yon viza G-2, se sa kèk sous ofisyèl ameriken fè konnen. Viza diplomatik sa a fèt eksklizivman pou reprezantan ofisyèl yon Leta oswa pou delegasyon k ap patisipe nan reyinyon diplomatik ak òganizasyon entènasyonal Etazini rekonèt, tankou ONU, OEA, FMI oswa Bank Mondyal.
Viza G-2 pa yon viza pèsonèl, ni yon viza touris, ni yon viza biznis. Ou pa gen dwa viv ak li nan yon peyi etranje, fè zafè prive, ni mennen lavi òdinè. Li gen yon kad strik, yon dire limite, epi li mare dirèkteman ak yon misyon ofisyèl Leta oswa entènasyonal.
Se la kesyon fondamantal la ap poze : ki moun ki te pèmèt Carel Pedre jwenn viza G-2 sa a ?
Èske se Leta ayisyen, pandan li pa janm okipe okenn pòs diplomatik ofisyèl ? Oswa èske se atravè yon òganizasyon entènasyonal Etazini rekonèt li te jwenn dokiman sa a ? Jiska prezan, pa gen okenn klarifikasyon piblik sou pwen sa a.
Sa ki pi grav la, selon plizyè sous serye, viza G-2 a te deja ekspire. Sitiyasyon sa a mete animatè a nan yon pozisyon imigrasyon ekstrèmman frajil. Jounalis ayisyen Valerio Saint-Louis fè konnen, daprè enfòmasyon li verifye, dosye sa a ta bay ICE anviwon 95 % chans pou depòte l.
Pou rapèl, Carel Pedre te arete depi 21 desanm 2025 nan Broward, Florid, pou « vyolans dimestik ». Depi lè sa a, dosye a kontinye reveye opinyon piblik la. Ant itilizasyon yon viza diplomatik, absans estati ofisyèl, wòl otorite ayisyen yo ak ekspirasyon dokiman an, dosye sa a mande verite, transparans ak responsabilite.
Opinyon piblik la pa bezwen rimè. Li bezwen repons. Dosye Carel Pedre la se yon tès serye sou fason viza diplomatik Ayiti yo itilize, epi sou respè règ entènasyonal yo.
